Qırımtatar Milliy Meclis azası Şevket Kaybullayev Qırımda qavmiy cemiyetler aqqında Rosstat tarafından berilgen malümatnı yañlış tanıy ve eali arasında öz-özüni cedvelge aluvnı keçirip, daa da doğru raqamlarnı elde etmege mümkün olğanını bildire.
Bunı Meclisniñ matbuat hızmeti haber ete.
Onıñ fikrine köre, Qırımnıñ şimdiki vaziyeti açıq-aydın cedvelge aluvnı keçirmege imkân bermey, şunıñ içün onıñ neticeleri obyektiv degil.
«Qırımtatar ve tatar olaraq adlanğan gruppanıñ miqdarını bile sayıp olamadılar, neticede 12,6% çıqtı, 2001 senesine köre tek yarım fayız artqan», – dey Meclis azası.
Şimdi Kaybullayev şunı qayd etti ki, bu eki gruppanı bir etmege doğru degil, çünki Qırımda qazantatarları da yaşay.
«Böyle alda eali arasında öz-özüni cedvelge aluvnı keçirmek lâzim. Bunı resmiy akimiyet tanımasa da, qırımtatarlarnıñ özleri miqdar ve terkibi aqta haberdar olur edi», – dey Kaybullayev.
Evel Rosstat Qırımda 2 mln 284 biñ sakin yaşağanı aqqında malümatnı aşkâr etti, olardan 96,2% öz milliy mensüpligini qayd etti.
Yarımadada sayısı eñ oçq olğan ruslardır – 1,49 mln insan (milletini qayd etken ealiniñ 68%). Ekinci yerde, Rosstat malümatına köre, ukrainliler – 344,5 biñ (15,7%). Üçünci yerde – qırımtatarlar. Yarımadanıñ 232,3 biñ sakini (ealiniñ 10,6%) özüni qırımtatar dep tanıy. Daa 45 biñ insan (qırımlılarnıñ 2%) özüni tatar olaraq tanıttı.
