Qırım akimiyeti – baş nazir Sergey Aksönov ve spiker Vladimir Konstantinov mart 25 künü Federatsiya Şurasında Qırım Cumhuriyeti Künleri çerçivesinde keçirilecek tedbirlerge qoşulıp, yarımadanıñ Rusiyege qoşuluvı aqqında arizaları ile çıqışta bulunacaq.
Bunı Qırım ükümetiniñ matbuat hızmeti bildire.
Şu cümleden, Aksönov Federatsiya Şurasınıñ 370-nci toplaşuvında «Qırım – deñişüv territoriyası» arizası ile çıqışta bulunıp, yarımada inkişafı ve onıñ Rusiye Federatsiyasınıñ uquqiy alanına qoşuluvı aqqında tarif etecek. Aynı böyle ariza ile Konstantinov de çıqış etecek.
Rusiye Federatsiya şurasında mart 23-25 künleri Qırım künleri keçe. Çeşit medeniy tedbirlerden ğayrı, iqtisadiy blok sualleri baqılacaq.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
