Türkiye eyyeti Qırımğa keldi, dep haber etti RİA Novosti agentligine Qırımnıñ Rusiye akimiyetiniñ baş nazir muavini Ruslan Balbek.
«Türkiye eyyeti şeer başları, ticaret, cemaatçılıq erbapları seviyesinde temsil etilgendir», – dedi Balbek.
Onıñ sözlerine köre, eyyet «qırımlılar barışıq ve amanlıqta yaşağanından» emin ola bilir.
«Olarnıñ ziyarеti – müsbet bir işmardır, böylece qırımlılar Qırımnıñ Rusiye Federatsiyasına qoşulğanından memnün olğanını, Qırım halqları inkişafı içün imkân körgenini añlarlar»,– dedi Balbek.
Yarımada işğalinden soñ qırımtatarlarnıñ vaziyetini ögrenecek eyeytniñ yollanuvı aqta teşebbüsni bıltır noyabr ayında Türkiye tış işler naziri Mevlüt Çavuşoğlu bildirdi.
Türkiye tış işler nazirligi mart 15 künü Rusiye qırımtatarlarğa nisbeten vade sözlerini eda etmegeni aqqında bildirdi.
Kiyevge mart 20 künü kelgen Türkiye prezidenti Recep Tayip Erdoğan memleketi qırımtatar halqınıñ aqlarını halqara seviyesinde qоrçalamağa devam etecegini bildirdi.
