Link açıqlığı

ATR yolbaşçılığı: duşman olmağa istegen telekanal degilmiz


ATR qırımtatar telekanalında Rusiye litsenziyasınıñ elde etilmesi ile bağlı meseleni al etmege tırışalar. Yolbaşçılıqnıñ sözlerine köre, telekanal bunı qanun çerçivesinde yapmağa areket ete ve yayınlav küreşinde birevge duşman olmağa istemey.

Bunı Qırım.Aqiqatqa ATR baş müdiri Elzara İslâmova bildirdi.

«Ebet, qandırmağa tırışamız, añlaşmağa, amma er şey jurnalist etikasınıñ çerçivesinde olmalı. Biz kütleviy haber vastası olamız da. Bu qadar. Duşman olmağa istegen bir kanal degilmiz, bu bizim maqsadımız degil», – dedi İslâmova.

ATR Rusiye qanuniyetine köre qayd etüvniñ elde etilmesi aqta Roskomnadzordan bir qaç kere red cevabını ala edi. Telekanalda tüşüneler ki, aprel 1-den yayınlavı toqtatıla bilecek. Bu sebepten Rusiye prezidenti Vladimir Putinge bir sıra muracaat yollanılğan edi.

Mart 24 künü Moskvada Qırımnıñ Rusiye akimiyetiniñ başı Sergey Aksönov ATR qırımtatar telekanalınıñ yayınlavı ile bağlı problemler mahsus ziddiyetni doğurtmaq maqsadı ile yapılğan muhalifetniñ areketidir dep aytqan edi. Bundan evel Aksönov ATR telekanalınıñ işini takbih etti ve böyle siyaseti olğan matbuat vastalarınıñ yarımadada çalışuvı mümkün olmağanını bildirdi.

Mart 25-den telekanal efirinde bu munasebet ile er kün «ATRni oldürmeñiz» telemarafonı keçirilecek.

XS
SM
MD
LG