Link açıqlığı

Litvaniyada Qırım işğali aqqında filmni kösterdiler


Filmni Litvaniyanıñ haber bürosında numayış ettiler. Babylon 13 ukrain icadiy birliginiñ filmi Qırımda, bıltır, mayıs ayında, Rusiye tarafından yarımada işğaline ketirgen qanunsız referndumdan evel olğan adiseler aqqında tarif ete.

Filmni Litvaniya deputatları, jurnalistler, cemaat erbapları seyir etti. On beş daqqalıq filmniñ numayışından evel çetel işleri boyunca parlament komiteiniñ başı Benediktas Yuodka çıqışta bulundı. Litvaninânıñ Qırım işğali ve Ukrainada olğan vaqialar boyunca mevamı deñişmegenini bildirdi.

«Yıl evelsi Rusiye Qırımnı tutıp aldı ve Ukrainanıñ bu qısmını Rusiye toprağı olaraq adladı. Ukrainada içki ziddiyet ketkeni, ecnebiy istilâ olmağanında israr ete ve Rusiyeniñ Ukraina cenkine alâqası yoq olğanını bildire. (…) Rusiye teşviqatı referendum, Qırımnıñ göñülli şekilde Rusiyege qoşuluvı aqqında ayta. Amma Putin bu mahsus planlaştırılğan bir ameliyat ve onıñ şahsiy qararı olğanını tanıdı», – dey diplomat.

Qırım statusı aqqında «referendum» işğali yıllığınıñ arfesinde, mart 15 künü, «Rossiya 1» telekanalı «Qırım. Vatan yolu» filmni taqdim etti. Eki saatlik vesiqalı film. Mında Rusiye prezidenti Vladimir Putin ve yarımadada bıltır olıp keçken diger adiselerniñ iştirakçileri Qırımnıñ Moskvağa keçkenine öz noqtaiy nazarını bildireler.

Ukraina baş naziri Arseniy Yatsenük adliye nazirligine Putinniñ intervyüsini Halqara cinaiy mahkemesine yollamağa avale etti.

XS
SM
MD
LG