Qırım musulmanları diniy idaresi musulmanlarnı «Merhametlik» hayriye aktsiyasına qoşulıp, hasta olğan ve yardımğa muhtac olğanlarğa lâqayt qalmamağa çağıra. Bunı QMDİ matbuat hızmetiniñ resmiy saytı bildire.
Berilgen malümatqa köre, «Merhametlik» aktsiyasınıñ neticeleri Ramazan ayınıñ soñunda ilân etile, musulmanlarnıñ sadaqaları ise yıl devamında berile.
«Aman-aman er kün Diniy idarege hasta olğan balalarnıñ ana-babaları, büyük ve qart adamlar muracaat ete, er birine sadaqa parasına köre yardım etile. Hayriye yardım köstermege istegen adamlarnı sadaqa parasını Müftiyatnıñ merkeziy ofisine ya da rayon imamlarına «Merhametlik aktsiyasına» qaydı ile bermege rica etile», – aytıla beyanatta.
«Merhametlik» aktsiyası 2009 senesi başlatılğan edi. Bu müddet devamında umumen 6 mln. 579 biñ 967 ruble (2 mln. 193 biñ 322 grivna) toplanğan edi. «Merhametlik» aktsiyası vastasınen 484 hastağa yardım etildi.
Keçken sene «Merhametlik-2014» hayriye aktsiyası devamında 2 mln. 283 biñ 511 ruble (746 biñ 170 grivna) toplanğan edi.
