Ukraina prezidenti Petro Porоşenko Ukrainada mayıs 8 künü qayd etilecek Hatıra ve barışuv Kününi ilân etti.
«2015 senesi Avropada natsizm üzerinde ğalebeniñ 70 yıllığı ve Ekinci cian cenkiniñ yekünlemesiniñ 70 yıllığı munasebeti ile keçirilecek tedbirler aqqında» ferman devlet başınıñ resmiy saytında mart 24 künü aşkâr etildi.
Vesiqada Kiyevde ve diger meskün yerlerde Ekinci cian cenkiniñ tarihiy vaqialarına bağışlanğan tedbirlerniñ keçirilmesini planlaştırmaq teklif etile, şu cümlede – 2015 senesi mayıs 8 ve 9 künleri – Avropada natsizm üzerinde ğalebeniñ 70 yıllığı, Hatıra ve barışuv Künü, Ğalebe Künü, 2015 senesi sentâbr 2 künü Ekinci cian cenkiniñ yekünlemesiniñ 70 yıllığına bağışlanğan tedbirler.
Ukraina tış işler nazirligine devlet başı tedbirlerge çetel devlet, halqara teşkilât ve ukrain diaspora temsilcilerini davet etmege teklif ete.
