Qırım parlamentiniñ spikeri Vladimir Konstantinovnıñ fikirince, «Rusiyege qarşı çıqqan Qırımtatar Milliy Meclisiniñ reberligi 2014 senesi mart 16-dan soñ ölgen element oldı».
Bunı olar MİA «Rossiya segodnâ» matbuat konferentsiyasında bildirdiler.
«Qırım iç bir vaqıt milletlerara problemalarnı körmedi. Vaziyet kerginleşkende Kiyev akimiyeti qırımtatar halqınıñ yetekçilerini qullanmağa tırışqan edi, olarğa em spiker, em baş nazir vazifeleriniñ berilecegini vade etken edi. Meclisniñ reberligi ruslarğa qarşı yönelgen edi. Referendumdan soñ bu ğaye yoq oldı, bu reberlik bitken element oldı, halqnıñ appenditsiti olaraq bir kimsege kerekmey», – dedi o.
Konstantinovnıñ bildirgenine köre, Qırım reberliginiñ yañı vazifesi – «yañı Rusiye Qırımınıñ qurulmasıdır».
Vladimir Konstantinovnıñ aytqanına köre, keçken sene olıp keçken vaqialar devamında, «referendum» arfesinde Qırımtatar Milliy Meclisiniñ reisi Refat Çubarov parlament reisi vazifesini alacaq edi.
Böyle etip Qırım spikeri Refat Çubarovnıñ keçken sene yarımada işğali arfesinde qırımtatarlarnıñ vaziyetni kerginleştirecek areketlerniñ yapılması içün provokatsiyalar yapılğanı aqqında Qırım.Aqiqatqa aytqanlarına cevap berdi.
