Qırım akimiyeti narazılıq aktsiyalarından qorqmay, dep bildirdi Qırım yolbaşçısı Sergey Aksenov MİA «Rossiya segodnâ» matbuat konferentsiyasında.
Böyle etip Qırımnıñ Rusiye baş naziri jurnalistniñ ukrain şairi Taras Şevçenkonıñ hatırasına keçirilgen aktsiya iştirakçileriniñ yaqalanma sebebi aqqında sualine cevap berdi.
«Qırımlılar bir şeyden qorqmaylar, olar bunı endi isbatladılar. Mında memuriy bozuvlar aqqında laf kete, tedbirler keçirilmesiniñ qaideleri bar. Belki de, birisi bundan faydalanacaq olacaq ola. Dünyanıñ er bir memleketinde kütleviy aktsiya keçirilmesi qaideleriniñ bozulması içün politsiya memuriy protokollarnı tizip, qabaatlılarnı yaqalay», – dep tekrarlay Aksenovnıñ aytqanlarını RİA-Novosti.
Mart 9-da Aqmescitniñ Gagarin bağçasında ukrain şairi Taras Şevçenkonıñ hatırasına keçirilgen aktsiya iştirekçileri yaqalanıp, Demir yol rayon politsiya bölügine alıp ketirilgen ediler. Mart 12-de mahkeme olıp keçti, faallerni ukrain timsallerini qullanğanlarından sebep cezaladılar. Mahkeme faallerni 40 saatlik mecburiy işler ile cezaladı.
