Link açıqlığı

Çarşenbe künü, mart 25-ten itibaren ATR qırımtatar telekanalınıñ efirinde onıñ qapatılması havfına bağışlanğan «ATRni öldürmeñiz» telemarafonı er kün keçirilecektir, dep haber ete 15 minut.

Telemarafon çarşenbe künü saat 18:00 başlanacaq ve saat 21:30 qadar devam etecek. Cumaaqşamı kününden itibaren saat 12-den saat 21.30-ğa qadar keçirilecek (haberler ve «Gravitatsiya» yayını ile beraber).

Telemarafon mart 31-ge qadar devam etecektir.

Er bir insan telemarafonda iştirak ete bile. İştirakçilerge +7978 077 95 95 telefonı vastasınen şimdiden yazılmağa teklif etile.

Mart 20-de ATR qırımtatar telekanalı Roskomnadzor mektübini aldı. Oña binaen, telekompaniyanıñ Rusiye qanunlarına köre kütleviy haber vastası olaraq qayd olmaq içün bergen arizası kene de baqılmayıp red etildi. Telekompaniya Roskomnadzorğa vesiqalarnı bir qaç kere bergen edi, amma olarnı qaytaralar.

ATR mediaholdingine kirgen diger kütleviy haber vastaları – Lâle qırımtatar bala telekanalı, «Meydan» radiosı ve «Lider» radiosı, em de «15 minut» haber agentligi aynı vaziyetke oğradı.

Qırım ükümetiniñ yolbaşçısı Sergey Aksenov ATR işini tenqid etip, bunıñ kibi siyaseti olğan kütleviy haber vastaları yarımadada çalışamaz.

ATR telekanalınıñ reberligi 2015 senesi aprel 1-den soñ işine devam etip olamaycaqlarını tahmin ete. Bu mesele mart 16-da Jenevada Birleşken Milletler Teşkilâtınıñ İnsan aqları komitetinde muzakere etilgen edi.

Telekanalnıñ işi toqtatıla bile dep, seyirciler ve faal cemaat Rusiye prezidenti Vladimir Putinge yarımadada milliy kütleviy haber vastalarını saqlap qalmaq açıq muracaatını yolladılar.

XS
SM
MD
LG