Link açıqlığı

Meclis: Rusiyeniñ eali cedvelindeki etnik gruppalar aqqında malümat – yañlıştır


Qırımtatar Milliy Meclisi 2014 senesi işğal etilgen Qırımda Rusiye tarafından keçirilgen ealini cedvelge aluv tedbirleriniñ ilk neticeleri kerçek olmağanını tüşüne.

Bunı Qırımtatar Milliy Meclisi reisiniñ birinci muavini Nariman Celâl Qırım.Aqiqatqa bildirdi.

Eali cedveliniñ birinci neticeleri köstere ki, 13 yıl evelsi olğan etnik ruslarnıñ sayısı arttı, etnik ukrainlerniñ sayısı ise eksildi. Qırımtatarlarnıñ sayısı da arttı – 232,3 biñ sakin (ealiniñ 10,6%), daa 45 biñ adam (qırımlılarnıñ 2%) özüni tatar dep tanıttı.

«Bizler ealini cedvelge aluvğa büyük ümüt etmegenimizni birden aytqan edik. Bizler qırımtatarlarnı iştirak etmemege çağırmağan edik, er kes özü qarar alsın, dep ayttıq. Bilem ki, bir çoq adam iştirak etmekten vazgeçti. Seslendirilgen raqamlar menim içün müim bir malümat degil», – dedi Celâl.

Onıñ zanınca, 280 biñ qırımtatarı kibi raqam «bir çoq sual doğurmaqta».

«280 biñ – bizler bu raqamnı daa 90-ıncı yılları seslendirgen edik. Bu vaqıt devamında, bir çoq ekspert de bunı aytqan edi, Qırımda diger milletlerge köre eñ çoq qırımtatarlarnıñ sayısı artqan edi, bazıları bundan sebep qasevet çekken ediler», – dep ayttı Meclis reisiniñ birinci muavini.

Celâlnıñ fikirince, berilgen malümat «yañlış», çünki 20 yıl devamında ketken qırımtatarlar aman-aman olmadı, soñki yıl devamında ise Qırımnı bir qaç biñ kişi terk etti.

Keçken aftanıñ soñunda Rusiye statistikasınıñ bergen malümatına köre, Qırımda 2 mln 284 biñ sakin yaşay, olardan 96,2% millet mensüpligini ayttı.

Yarımadanıñ eñ büyük millet gruppası ruslardır – 1,49 mln insan (ealiniñ 68%). Ekinci yerde ukrainler. Olarnıñ yarımadadaki sayısı 344,5 biñni (15,7%) teşkil ete.

XS
SM
MD
LG