Ukraina prezidenti Petro Poroşenko Ukrainağa iş ziyareti ile kelgen Birleşken Milletler Teşkilâtı Baş kâtibiniñ muavini ve BMT İnkişaf programmasınıñ yolbaşçısı Helen Clark ile körüşti.
Devlet yolbaşçısınıñ matbuat hızmeti bildire ki, taraflar bir sıra meseleni muzakere ettiler, olarnıñ arasında esas meseleler – Donbass vaziyeti ve regiondaki vaziyetni eyiliştirmek içün BMT barıştırıcılarınıñ celp etilmesidir.
BMT Baş kâtibiniñ muavini Helen Clark Ukrainanıñ bir sıra barıştırıcı missiyalardaki büyük rolüni ve dünyanıñ farqlı köşelerinde barışçtırıcı esnaslardaki büyük issesini qayd etti.
Subetdeşler Ukrainada islâatlar keçirilmesini ve memleket içinde anayasa dialogınıñ qurulmasını muzakere ettiler. Ukraina prezidenti akimiyetni merkezden çekmek maqsadı olğan islâat aqqında aytıp, «Ukraina bu saada dünyanıñ eñ yahşı örnegini, şu cümleden Poloniya örnegini qullanmağa tırışqanını ve BMT İnkişaf programmasınıñ anayasa deñişmeleri ve islâatlarğa qoltutacağına ümüt etkenini» bildirdi.
Taraflar BMT İnkişaf programması Ukrainanıñ anayasa deñişmelerine qoşulacaq ve anayasa dialogına yardım etecek, dep añlaştılar.
Helen Clark Ukraina ketken islâatlar yoluna Şarqtaki Rusiye istilâsı ve Qırım işğaline baqmadan devam etecegine ümüt etkenini bildirdi. O, BMT İnkişaf programmasınıñ Ukraina islâatlarına qoltutmaq azır olğanını ayttı.
