Link açıqlığı

Qırımlılar ATR telekanalınıñ ola bilecek qapatıluvı aqqında tarif ettiler


Aqmescit sakinleri ATR qırımtatar telekanalınıñ ola bilecek qapatıluvına farqlı munasebette bulunalar. Bunı bazarertesi künü, mart 23-de, Qırım.Aqiqat mühbiri tarafından keçirilgen sorav neticeleri köstere.

«Menfiy munasebette bulunam, çünki bu – qırımtatar halqınıñ ayırılmaz qısmı olğan yekâne qırımtatar telekanalıdır», – dey qırımlı.

«Bir şeyni qapatmağa kerekmey, insanlar ile çalışmaq, añlatmaq ve añlaşmaq kerek», – dey Aqmescit sakini Yevgeniy.

«Eyi degil, dep tüşünem», – razı oldı onen bir esli başlı erkek.

«Rusım, diger meselelerim olğanından sebep qıymet kesemem. İşbu telekanal aqqında eşitken edim, adiselerni yañlış köstereler, öyle olsa, olarnı qaptamaq kerek», – dedi Aqmescit sakini.

Aqmescitlilerden bazıları bu aqta şahsiy fikirleri olmağanını bildirdiler.

Mart 20-de ATR qırımtatar telekanalı Roskomnadzor mektübini aldı. Oña binaen, telekompaniyanıñ Rusiye qanunlarına köre kütleviy haber vastası olaraq qayd olmaq içün bergen arizası kene de baqılmayıp red etildi. Telekompaniya Roskomnadzorğa vesiqalarnı bir qaç kere bergen edi, amma olarnı qaytaralar.

ATR mediaholdingine kirgen diger kütleviy haber vastaları – Lâle qırımtatar bala telekanalı, «Meydan» radiosı ve «Lider» radiosı, em de «15 minut» haber agentligi aynı vaziyetke oğradı.

Qırım ükümetiniñ yolbaşçısı Sergey Aksenov ATR işini tenqit etip, bunıñ kibi siyaseti olğan kütleviy haber vastaları yarımadada çalışamaz, dep ayttı.

Telekanal üzerinde qapatıluv telükesi olğanından sebep Vladimir Putinde seyircilerden yarımadada milliy matbuat vastalarını saqlamaq ricası ile açıq muracaat yollanıldı.

XS
SM
MD
LG