Bağçasaray rayonınıñ sabıq başı, Qırımtatar Milliy Meclis azası İlmi Ümerov Rusiye Taqiqat komitetiniñ Qırım idaresinde Ahtem Çiygoznıñ faydasına cevap berdi. Bunı Ümerovnıñ özü Qırım.Aqiqat mühbirine bildirdi.
«Adiy taqiqat sualleri. Ahtem Çiygoznıñ faaliyeti, fevral 26 künü mitingniñ teşkilâtçıları aqqında soray ediler. Ahtem aqqında sorağanda, onı miting devamında bir qaç kere körgenimni ayta edim. O, ep insanlarnı tınçlandırmağa areket ete edi», – dey İlmi Ümerov.
Bağçasaray rayonıñ sabıq başı sorğuda onı yalıñız fehral 26 künü aqqında sorağanlarını bildirdi, başqa sual yoq edi. «Kerek olsa, aynı şunı mahkemede de ayta bilem», – dedi İlmi Ümerov.
Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildire ki, Çiygoznı «kütleviy numayışnı teşkil etüv ve iştirak etüvde» şekleyler. Qırım Yuqarı Mahkemesi fevral 6 künü SİZOda bulunğan Qırımtatar Milliy Meclis reisiniñ muavini Ahtem Çiygoznıñ şikâyet arizasını red etti. Rusiye Taqiqat komiteti Meclis reis muavini Ahtem Çiygoznğa 2015 senesi fevral 19-na qadar, soñra mayıs 19-na qadar apis müddetini belgiledi.
Qırım Taqiqat komitetiniñ malümatına köre, fevral 26 künü vaqiaları çerçivesinde şaat olaraq 150 insan sorğudan keçti, zarar körgen 40 insan belgilendi ve 2 şahıs mesülietke çekildi.
2014 senesi fevral 26 künü Qırım parlamenti yanında Qırımtatar Milliy Meclis ve «Rusiye birligi» tarafdarları ile kütleviy miting keçti.
