Aqyarnıñ birinci mudafaası vaqtında elâk olğanlarnıñ mezarlığında yañı mezar – adsız. Qırım.Aqiqat mühbiri aytqanı kibi, sabıq ukrain prezidenti Viktor Yanukoviç oğlunıñ mezarında merhum aqqında iç bir malümat yoq.
Qırım.Aqiqat mühbirine Svâto-Nikolskiy mabeti yanındaki mezarlıqnıñ hızmetçisi aytqanı kibi, mında bazarertesi künü, mart 23-de, üyleden evel cenaze keçirildi.
Adamnıñ aytqanı kibi, cenaze qapalı şekilde keçti, mezarlıqnıñ etrafı ise sarıp alınğan edi. Amma merhumnıñ aqqında malümatnı adam aytmağa istemedi.
Erkekniñ sözlerine köre, mında endi jurnalistler kelip, foto ve video çıqara ediler.
Evel Rusiye ve Qırım matbuat vastaları Viktor Yanukoviçniñ cesedi Aqyarda defin etilgeni aqqında bildirgen ediler.
Mart 22 künü kence Yanukoviçniñ Rusiye Baykal özeninde ölgeni aqta malümat peyda oldı.
Rusiye matbuat vastaları, Rusiye fevqulâde işler nazirlige esaslanıp, Baykaldaki yol qazasında 33 yaşında moskvalı Viktor Davıdovnıñ vefat etkeni aqqında bildire edi. Bunıñ ile «Davıdova» soyadı Viktor Födoroviç Yanukoviçniñ apayınıñ qız soyadı olğanı aqta malümat peyda ola.
Bazarertesi künü, mart 23-de, Rгsiye prezidenti spikeri Dmitriy Peskov Yanukoviçniñ ölümi aqta bir şey aytıp olamaycağını bildirdi.
