Rusiye matbuat vastalarınıñ malümatına köre, bazarertesi künü, mart 23-de, Ukraina sabıq perzidenti Viktor Yanukoviçniñ oğlu – Viktor Viktoroviç Yanukoviçni defn ettiler. LifeNews Rusiye neşiri bildirgeni kibi, Yanukoviçniñ cesedi Aqmescitten Aqyarğa ketirildi. Aqmescitke onı «Tsentr-Yug» ava şirketiniñ İrkutsk – Ufa – Aqmescit marşrutı boyunca ketirdiler.
«Moskva vaqtı boyunca saat 13:10 uçaq Qırım ava limanına keldi. Kence Yanukoviçniñ cesedini Aqyarğa ketirmek içün bir saat kerek oldı. Aqyar kilseleriniñ birinde keçirilgen vedalaşuv tedbirinden soñ, onı yerli arbiy mezarlığında defn ettiler. Mabet ögündeki bayraq adet üzre tüşürildi», – dep yaza LifeNews.
Neşir Aqyar pravoslav mabetiniñ fotolarını derc ete, amma vedalaşuv tedbiri ya merhumğa alâqası olğan başqa fotolarnı aşkâr etmey.
Aqyarnıñ Uquq çıqarıcı toplaşuvınıñ resmiy saytında Ukraina sabıq prezidenti Vkitor Yanukoviçniñ cenazesi aqta iç bir malümat yoq.
Evel Regionlar firqası Ukraina sabıq prezidenti Vkitor Yanukoviç oğlunıñ ölümini resmiy şekilde tasdiqlağan edi.
Mart 22 künü kence Yanukoviçniñ Rusiye Baykal özeninde ölgeni aqta malümat peyda oldı.
Rusiye matbuat vastaları, Rusiye fevqulâde işler nazirlige esaslanıp, Baykaldaki yol qazasında 33 yaşında moskvalı Viktor Davıdovnıñ vefat etkeni aqqında bildire edi. Bunıñ ile «Davıdova» soyadı Viktor Födoroviç Yanukoviçniñ apayınıñ qız soyadı olğanı aqta malümat peyda ola.
Bazarertesi künü, mart 23-de, Rгsiye prezidenti spikeri Dmitriy Peskov Yanukoviçniñ ölümi aqta bir şey aytıp olamaycağını bildirdi.
