Aqmescitte, Tavrida merkeziy müzeyinde keçirilgen sergide Rusiye qıraliçesi II Yekaterinağa Qırım paytahtında qoyulacaq abideniñ maketini kösterdiler.
Müzeyde qayd etilgeni kibi, maket «Rusiye birligi» cemaat teşkilâtınıñ maliye destegi ile ve müzeylerde, şahsiy toplamlarda saqlanılğan fotolar esasında yapıldı.
Müzey musafirleri Aqmescitniñ Şeer bağçasında II Yekaterina abidesi qoyulacaq yerde bundan evel olğan abide fotolarını kösterdiler.
Aqmecsit merkezinde II Yekaterina abidesiniñ qoyulması içün taş daa 2006 senesi qoyuldı. Abideniñ qoyulmasına qırımtatarlar qarşı çıqqan edi. Meclis başı olğan Mustafa Cemilev Qırımda böyle abideniñ olması qırımtatarlarnı aşalaycağı aqqında dey edi. 2007 senesi qırımtatarlarnıñ narazılıq numayışları keçirile edi.
