Moldovanıñ Gagauz Yeri muhtariyetiniñ saylayıcıları ülke valisi saylavlarında Rusiyege qoltutqan İrina Vlahqa rey berdiler.
Bunı regionnıñ merkeziy saylav komissiyası bildirdi.
Vlah saylavlarda mustaqil namzet olaraq iştirak etip, reylerniñ 51% qazandı. Onıñ raqibi – Gagauz Yeriniñ paytahtı Komratnıñ sabıq yolbaşçısı Nikolay Dudoglo reylerniñ 19 fayızını qazandı.
Gagauz Yeriniñ şimdiki yolbaşçısı Mihail Formuzal Vlahnı ğalebenen tebrikledi.
Bundan eve Vlah parlament deputatı olğan edi, endiden soñ, Moldovanıñ qanunlarına köre, Gagauz Yeriniñ yolbaşçısı Moldova ükümetiniñ azası ola.
Gagauz Yeri – iqtisadiyatı mustaqil, lâkin Moldova politsiyası, mektepleri ve mahkemeleri olğan regiondır, anda esasen türk halqı olğan gagauzlar yaşaylar.
Keçken sene olıp keçken referendumda Gagauz Yeri Avropa Birligi yolundan vazgeçip, Rusiye ile yaqınlaşuvğa qoltuttı.
Keçken afta Moldova memurları Rusiye televideniyesiniñ jurnalistlerine Gagauz Yerindeki saylavlarnı aydınlatmağa yasaq ettiler.
