Qırım ve Aqyar şeeri musulmanlarınıñ diniy idaresi dindaşlarına muracaat etip, Qarasuvbazar rayonındaki Köktaş köyünde (Sinekamenka) eski caminiñ minaresini qurmaq içün yardım etmege rica ete.
Bu aqqında Musulmanlarnıñ diniy idaresiniñ matbuat hızmeti bildire.
«Elimizde olğan malümatqa köre, XVI asırğa ait Köktaş camisiniñ tamiri keçken sene küzde başlanğan edi, yerli musulmanlarğa Qırımnıñ er bir rayonından, Rusiye Federatsiyası, Ukraina ve Türkiyeden yardım ettiler. Qayd etmeli ki, eski caminiñ tiklenmesine em musulmanlar, em hristianlar yardım etti», – dep bildire QMDİ.
Müftiyatnıñ malümatına köre, camide işler devam etmekte, bugünki künde cam bar, pencere ve qapular qoyuldı, şimdi içi yapıla.
«Cami azbarında iş bekley, qora qurulacaq, cami yolu töşenecek, lâkin minare qurucılığı esas vazifedir. Onıñ yüksekligi 12-13 metrni teşkil etecek», – aytıla beyanatta.
Qırım müftiyatı para toplamağa çağıra.
