Qırımtatar Milliy Meclis reisi Refat Çubarovnıñ fikirince, Ukraina devletiniñ Qırım yarımadasını qaytaruvnıñ yekâne strategiyası olmalı. Onıñ zanınca, ukrain cemiyeti Qırım keri qaytarılmasa, Ukraina topraq bütünligini qazanamaz.
Bunı o ZIK telekanalında bildirdi.
«Donetsk, Lugansknı bermege ve Qırımnı unutmağa çağıracaq insanlar ep bir olacaq. Olar Rusiye teşviqatınıñ yardımı ile peyda ola bileler. Lâkin bizler unutmamaq kerekmiz: işğalge razı olğan iç bir devlet çoq yaşamadı», – dedi Çubarov.
Onıñ qayd etkenine köre, Ukraina mustaqilliginiñ 23 yılı devamında Qırımda ukrainlikni is ettirmek içün az iş yapıldı. Çubarovnıñ fikirince, bunıñ neticesinde qırımlılarnıñ bir qısmı Kremlniñ Kiyev istilâsı aqqında yalanına inandı.
Ukraina baş naziri Arseniy Yatsenük bildirdi ki, Kiyev mahkeme teşkerüvleri institutınıñ hulâsalarına köre, Rusiye prezidenti Vladimir Putin ve Rusiye mudafaa naziri Sergey Şoygunıñ Qırım aqqında aytqanları halqara uquqnı bozmaqta.
Bundan sebep baş nazir Ukraina Tışqı işler nazirligi ve Baş prokuraturağa Gaaga mahkemesinde Rusiye Federatsiyasını Ukraina istilâsı içün mesüliyetke çekecek işke başlamağa avale etti.
