Rusiye akimiyeti Qırımğa kirişi beş yılğa qadar yasaq etilgen Qırımtatar Milliy Meclis reisi Refat Çubarovnıñ yarımadada bulunmaq imkânı olmağanından sebep temsil organnıñ işini Nariman Celâl baqacaq.
Böyle etip Meclis Nariman Celâlnıñ Çubarovnıñ birinci muavini vazifesine saylanmasını izaatladı.
«Bu reis degil – Qırımdaki milliy idare organları faaliyetini baqacaq adamdır. Bizler üküm sürgen vaziyetke esaslandıq. Birinci muavin olmaq kerek», – dep ayttı Nariman Celâl Qırım.Aqiqat mühbirine.
«Refat Çubarov Meclisniñ er bir azasınen laf etip, olarnıñ fikirlerini ögrendi ve çoqluq qoltutqan namzetni teklif etti», – dedi o.
Malüm ki, mart 21-de Meclisniñ Aqmescitteki toplaşuvında temsil organ reisiniñ birinci muavini olaraq Nariman Celâl saylandı, Bağçasaray rayonınıñ sabıq reisi İlmi Ümerovnı Meclis reisiniñ muavini olaraq sayladılar.
