Moldova cenübindeki Gagauz Yerinde muhtariyetniñ yolbaşçısını saylaylar. Bunı Radio Svoboda bildire.
10 adam namzet kösterdi. Olar mustaqil olaraq qayd etildi. Muhtariyetniñ şimdiki yolbaşçısı namzetini köstermedi: qanun oña üçünci sefer namzet köstermege yasaq ete.
Rey berüvni 180 yerli ve halqara közetici nezaret etmekte, olarnıñ arasında Mustaqil Devletler Birliginiñ parlamentlerara assambleyası, Avropa birligi ve Birleşken Milletler Teşkilâtınıñ nezaretçileri bar.
Gagauz Yeriniñ Merkeziy saylav komissiyası bildire ki, saylavlarda 105 biñ saylayıcınıñ 50 fayızından ziyadesi rey berse, saylavlar sayılacaq. Gagauz Yerinde 150 biñ kişi yaşay, 80 fayızından ziyade gagauzlar teşkil etmekte – ortodoks dinini kütken türk halqı.
