Mart 21-den 22-ge keçer gecesi ukrain arbiyleri ve Rusiyege qoltutqan separatistler arasında uruş çatışması yüz berdi. Bundan ğayrı, boyevikler ukrain mesken yerlerine 9 kere ateş açtılar.
Bunı ATO matbuat merkezi bildire.
«Gece saat birden başlap Vodnânoye rayonında uruş çatışması devam etti. ATO askerleri duşmannıñ küçlerine qarşılıq kösterdiler», – aytıla beyanatta.
Boyevikler gece silâ, granataatıcı ve 120-milimetrli minaatıcılardan ateş açtılar. Lugansk yolunda Stanitsa Luganskaya, Skolniki ve Trehizbenka, Donetsk yolunda da Opıtnoye ve Peski, Mariupol yolunda Şirokino ateş altında qaldılar.
ATO matbuat merkezi ukrain ordusınıñ duşmanları ava istihbaratını quvetleştirgenini bildire: «Mariupol civarında duşman ava istihbaratınıñ faalleşkeni qayd etilmekte. Mudafaa quvetlerimiz Zorâ, Kalçik, Talakovka, Kasyanovka üzerinde uçucısız uçaqlarnı taptılar».
Separatistlerniñ saytları keçken gece olğan çatışmalar ya da ateş aqqında haber etmeyler. Cumaertesi künü, mart 21-de, aqşam «DNR» vekilleri ukrain askerleri tarafından ateş açılğanını bildirdiler.
