Link açıqlığı

Cumaertesi künü, mart 21-de, Qırımtatar Milliy Meclisiniñ toplaşuvı ötkerilecektir. Tedbirde İlmi Ümerov temsil organnıñ reis vazifelerini icra etecek insan olaraq saylana bile.

Bunı Ukraina prezidentiniñ qırımtatar halqı işlerinden vekâletlisi, halq deputatı Mustafa Cemilev Kiyevde mart 21-de brifingde Qırım.Aqiqat mühbirine Rusiye taqiqat komiteti tarafından İlmi Ümerovnıñ sorğuğa çağırılmasını izaatlap bildirdi.

«Skype vastasınen Meclis toplaşuvını keçirecekmiz. İlmi Ümerov Meclis reisi vazifelerini eda etecek insan olaraq saylana bile», – dep ayttı Cemilev.

Onıñ qayd etkenine köre, Meclis reisi vazifelerini icra etken adamlar ve onıñ muavinleri Rusiye işğalci akimiyeti tarafından taqip etilecek adamlar cedvelinde birinci sırada turalar.

Al-azırda Meclis reisi Refat Çubarov ola, 2014 senesi yazda Rusiye akimiyeti oña işğal etilgen yarımadağa kirişini yasaq etti. Bundan evel aynı yasaqnı Cemilev alğan edi.

Qırım.Aqiqatnıñ malümatına köre, Bağçasaray rayonınıñ sabıq reisi, Qırımtatar Milliy Meclisiniñ azası İlmi Ümerov Rusiye Taqiqat komitetiniñ Qırım idaresine sorğuğa çağırıldı.

Celpnamege binaen, Ümerov bazarertesi künü, mart 23-te yerli saatke köre saat 17:00 sorğuğa kelmek kerek.

XS
SM
MD
LG