Qırımtatar Milliy Meclisiniñ reisi Refat Çubarov yarımadada işğal şaraitlerinde yaşamağa devam etken semetdeşlerine qoltutqanını bildirdi. O, «vatanında qalğan» qırımtatarlarğa yapılğan tenqitke qarşı çıqa.
Bunı Çubarov Facebook saifesinde yazdı.
«Qırımda qalıp, printsiplerini açıq sürette qorumağa imkânı olmasa da, olarnı bozmağan, işğalcilerge hızmet etmegen er bir insan er kün qoltutuv sözlerimizge ve Qırımnıñ azatını yaqınlaştırğan areketlerimizge lâyıqlar. Amma vatanında qalğan qırımtatarlarnıñ tenqitke oğratmasını qabul etmeyim», – dep yazdı Çubarov.
O, er keske sabır ve amanlıq tiledi.
«Bilem, işğalciler bizim toprağımızda vaqtınca, bizler ise epimiz vatanımızda birleşecekmiz: em evlerini terk etmege mecbur olğanlar ya da 1944 senesi mayıs 18 künü kibi Qırımdan atılğanlar, em de Qırımda qalıp, Evimizni qoruğanlar», – dep qayd etti Meclis reisi.
Birleşken Milletler Teşkilâtınıñ Havfsızlıq şurası mart 19-da Rusiye işğal etken Qırım vaziyetini muzakere etti. Toplaşuvğa qırımtatar halqınıñ lideri Mustafa Cemilev davet etilgen edi. O, Qırım işğalinden soñ yarımada sakinleri ciddiy siyasiy, içtimaiy, iqtisadiy aq ve insan aqlarınıñ bozulması ile qarşılaşqanını qayd etti.
