Mart 20-de Kiyevdeki körüşüvde Ukraina ve Türkiye prezidentleri Petro Poroşenko ve Recep Tayip Erdoğan qırımtatarlarnıñ aq-uquqları meselesinde Ukraina ve Türkiye areketlerini belgilemege qarar aldılar.
Bunı Ukraina devlet yolbaşçısınıñ saytı bildire.
«Bizler areketlerimizni belgileycekmiz, dep añlaştıq – şu cümleden – ileride halqara teşkilâtlarda qırımtatar meselesinde», – dep tekrarlay Poroşenkonıñ aytqanlarını onıñ matbuat hızmeti.
Cuma künü, mart 20-de, Türkiye prezidenti Recep Tayip Erdoğan Kiyevge ziyaret ile kelip, Ukraina-Türkiye yüksek Strategik şurasınıñ dörtünci toplaşuvında iştirak etti. Türkiye prezidenti bildirdi ki, onıñ memleketi qırımtatarlarnıñ aq-uquqlarını halqara alanda qorumağa devam etecek.
Türkiye Ukrainağa 10 million dollarlıq yardımnı ayırıp, 50 million dollarnı bücet defitsitiniñ qapatılmasına kredit olaraq berdi.
