Türkiye prezidenti Recep Tayip Erdoğan bildirdi ki, onıñ memleketi halqara alanda qırımtatar halqınıñ aq-uquqlarını qorumağa devam etecek. Bunı o, cuma künü, mart 20-de, Kiyevde Ukraina prezidenti Petro Poroşenko ile beraber keçirgen matbuat konferentsiyasında bildirdi, – dep haber ete UNİAN.
Erdoğan Ukrainanıñ ileride de farqlı etnik ve din cemiyetleriniñ, şu cümleden qırımtatarlarnıñ, aq-uquqlarını qoruycağına ümüt besley.
«Bizler bir yıldan berli basqı altında bulunğan qırımtatarlarnıñ vaziyetini nezaret etemiz. Ve qardaşlarımıznıñ meselelerini em eki taraflı körüşüvlerde, em de er angi halqara alanda kün tertibine çıqaracağına devam etecekmiz», – dep qayd etti Erdoğan.
Malüm olğanı kibi, Türkiye Ukrainağa 10 million dollarlıq içtimaiy yardım berip, Ukrainağa 50 million dollar miqdarında kreditni bücet defitsitiniñ qapatılması içün ayırmağa qarar aldı. Bunı Ukraina prezidenti Petro Poroşenko Türkiye prezidenti Recep Tayip Erdoğan ile Kiyevdeki körüşüvinden soñ bildirdi.
