ATR qırımtatar telekanalı cuma künü, mart 20-de, Bağ, informatsion tehnologiyalar ve kütleviy alâqalar nezareti federal hızmetiniñ (Roskomnadzor) mektübini aldı. Hızmet bildire ki, telekompaniyanıñ kütleviy haber vastası olaraq qayd etmek muracaat arizası kene de baqılmayıp, keri qaytarıldı.
Bunı «15 minut» haber agentligi bildire.
Dünyada yekâne olğan ATR qırımtatar telekanalı 2015 senesi aprel 1-ge qadar Rusiye qanunlarına köre kütleviy haber vastası olaraq qayd olamasa, işini toqtata bile. Telekompaniya Roskomnadzorğa bir qaç kere vesiqalarnı teslim etse de, olarnı keri qaytaralar.
ATR mediaholdingine kirgen diger kütleviy haber vastaları – Lâle qırımtatar bala telekanalı, «Meydan» radiosı ve «Lider» radiosı, em de «15 minut» haber agentligi aynı vaziyetke oğradı.
Qırım ükümetiniñ yolbaşçısı Sergey Aksenov ATR işini tenqid etip, bunıñ kibi siyaseti olğan kütleviy haber vastaları yarımadada çalışamaz.
ATR telekanalınıñ reberligi 2015 senesi aprel 1-den soñ işine devam etip olamaycaqlarını tahmin ete. Bu mesele mart 16-da Jenevada Birleşken Milletler Teşkilâtınıñ İnsan aqları komitetinde muzakere etilgen edi.
Telekanalnıñ işi toqtatıla bile dep, seyirciler ve faal cemaat Rusiye prezidenti Vladimir Putinge yarımadada milliy kütleviy haber vastalarını saqlap qalmaq açıq muracaatını yolladılar.
