Qırım ile demir yol alâqalarınıñ toqtatılması Devlet sıñır hızmeti, em de diger nezaret hızmetleri içün bir sıra qıyınlıqlar peyda etti, – dep bildirdi cuma künü, mart 20-de, Kiyevdeki brifingde Ukraina Devlet sıñır hızmeti memuriyetiniñ sıñır nezareti idaresiniñ üyken zabiti Vasiliy Barabaş.
Onıñ aytqanına köre, Ukraina Devlet sıñır hızmetiniñ reberligi bildire ki, Qırım ile demir yol alâqaları ğayrıdan tiklense, sıñırcılar nizamnı boza bilecek insanlarnı qıtağa kirsetmezler.
«Al-azırda Qırım ile sıñırda mütehassıslar, patlayıcı ve terrornıñ diger usullarını tapa bilecek tehnikiy imkânlar yeterlidir. Mence, mında iç bir problema çıqmaz», – dep ayttı Barabaş Qırım.Aqiqatnıñ suallerine cevap berip.
Malüm ki, dekabr 27-dep itibaren «Ukrzaliznıtsâ» havfsızlıq maqsadı ile Qırım ile demir yol alâqalarını toqtattı, em de yarımadağa qatnağan halqara trenlerni lâğu etti. Qırım trenleri artıq Novoalekseyevka ve Hersonğa qadar keteler. Qırım ile avtobus alâqaları da toqtatıldı.
