Link açıqlığı

İçtimaiy siyaset nazirligi: Ukrainada Qırım ve Donbasstan köçip kelgen 1 163 886 adam qayd etildi


Vilâyet ve Kiyev şeer devlet memuriyetiniñ ealisini içtimaiy qoruv bölükleriniñ malümatına köre, Ukrainada 2015 senesi mart 19-ğa qadar Qırım ve Donbasstan köçip kelgen 1 163 886 kişi ve 854 259 qoranta qayd etildi. Bunı mart 20-de Ukraina İçtimaiy siyaset nazirliginiñ matbuat kâtibi bildirdi.

Nazirlikniñ malümatına köre, 318 022 qoranta maddiy yardım istedi, olardan 292 600 ailege bu yardım berilecek. Umumen 504 mln. grivna berilecek.

Baş nazir muavini, regional inkişaf, qurucılıq ve mesken-kommunal hocalıq naziri Gennadiy Zubko bildirdi ki, Ukrainada mecburen köçip kelgen milliondan ziyade adam yardımğa muhtac.

Onıñ aytqanına köre, işçi gruppa İçtimaiy siyaset nazirligi ve fiskal hızmetler ile beraber köçip kelgenlerge birinci ihtiyac yardımını köstere bilecek gumanitar teşkilâtlar cedvelini tizecektir.

Ukraina baş naziri Arseniy Yatsenük içtimaiy siyaset nazirliginiñ 2015 senesiniñ soñuna qadar üç esas vazifesini belgiledi: yardımğa muhtac olğan vatandaşlarnıñ maddiy yardım parası, ATO iştirakçilerine yardım ve köçip kelgenlerge yardım.

XS
SM
MD
LG