Ukraina devlet sıñır hızmeti Ukraina insan aqları Helsinki birligi ile beraber vaqtınca işğal etilgen Qırımğa kiriş ve çıqış qaidelerini azırladı, dep bildirdi Ukraina sıñır hızmetiniñ matbuat kâtibi Oleg Slobodân Kiyevdeki matbuat konferentsiyasında.
«Vesiqa leyhası Adalet nazirliginde baqıldı ve ükümetke berildi. Ukraina Nazirler şurasınıñ idareleri tüzetken vesiqa ükümet komitetine teslim etildi», – dep ayttı Slobodân.
Onıñ malümatına köre, komitet işbu leyhanı mart başında baqıp, tüzetüv tevsiyelerini bergen edi.
«Al-azırda vesiqa tüzetile, ve bu esnas sozulmaycağına ümüt etemiz», – dep qayd etti ukrain sıñır hızmetiniñ temsilcisi.
2014 senesi mart ayında Rusiye Qırımnı işğal etken soñ qıtaiy Ukraina ve yarımada arasında memuriy, asılında ise tam bir sıñır peyda oldı. Qırım vaqtınca işğal etilgen topraq olaraq ilân etildi.
Dekabr 27-dep itibaren «Ukrzaliznıtsâ» havfsızlıq maqsadı ile Qırım ile demir yol alâqalarını toqtattı, em de yarımadağa qatnağan halqara trenlerni lâğu etti. Qırım trenleri artıq Novoalekseyevka ve Hersonğa qadar keteler. Qırım ile avtobus alâqaları da toqtatıldı.
