Rusiye Federatsiyası Qırımnı işğal etip, şimdi yarımadanı arbiy ve özek zonasına çevirmege areket ete. Bunı BMT ştab dairesinde keçirilgen matbuat konferentsiyasında Ukraina prezidentiniñ qırımtatar halqınıñ işlerinden vekâletlisi, Ukraina Yuqarı Şurasınıñ deputatı Mustafa Cemilev ayttı.
Cemilevniñ sözlerine köre, Rusiye Federatsiyası Qırımda özek anbarlarını tamir etip, mında özek silânı ketirmekte. O şunı da qayd etti ki, Qırım sabıq sovet alanında daa bir buzlatılğan ziddiyetke çevirile.
«Halqımız Qırım yaqın zamanda işğalden azat etilecegine ümüt besley», – dedi Mustafa Cemilev.
O dey ki, işğalniñ er yañı künü «yarımada sakinlerine yañı azap ketire». Qırımtatarlarnıñ çoqusı taqip ve ayırımğa oğray. Deputatnıñ aytqanı kibi, qırımlılarnıñ bir qısmı yarımadanı terk etmege mecbur oldı.
«Olarnı Qırımda – zornen qaytarılğan Vatanımızda qalmağa çağıramız. Ama insanlar qorqa. Qorqu müiti olarnı yarımdadan ketmege mecbur ete», – dedi Cemilev.
«İşğalden soñ kene sovet rejimine qayttıq. Onen nice yıllar devamında küreştik. Şimdiki rejim, sovetteki kibi, totalitardır. Amma o vaqıt insanlar, iç olmağanda, ğayıp olmay edi», – dedi o.
Mart 19 künü Birleşken milletler teşkilâtında keçirilgen Havsızlıq şurasınıñ toplaşuvında yalıñız deputatlar degil de, diger müessise ve teşkilâtlarnıñ vekilleri de iştirak ete bile edi. Toplaşuvda qırımtatar halqınıñ yetekçisi Mustafa Cemilev de iştirak etti.
