Mart 18 künü New Yorktaki Jurnalistlerni qoruv komiteti Roskomnadzorğa Qırım matbuat vastaları, şu cümleden ATR yekâne qırımtatar telekanalınıñ qayd etüv redini añlatmaq kibi talabını yolladı.
Komitette qayd etilgeni kibi, cevap alâ daa kelmegen.
İşbu teşkilâtnıñ malümatına köre, matbuat vastaları üzerinde nezaret organı aprel 1 künü soñuna yetecek qayd etüvge vesiqalarnı yollağan bir sıra qırım matbuat vastalarınıñ arizalarını red etti. Şu cumlden, QHA haber agentligi de.
Komitetniñ beyanatında aytılğanı kibi, 2014 senesi mart ayında başlanğan Rusiye işğalini aks etken jurnalistler ücüm, taqip etile, sorğuğa çekile edi. Muarririyetlerde tintüvler keçire, haberlerni efirge çıqarmay ediler. Jurnalistlerniñ bir qısmı Qırımnı terk etmege mecbur oldı.
Qırım ükümetiniñ yolbaşçısı Sergey Aksenov ATR yekâne qırımtatar telekanalınıñ işini tenqid etip, bunıñ kibi siyaseti olğan kütleviy haber vastaları yarımadada çalışamazlar, dep qayd etti.
ATR telekanalınıñ reberligi 2015 senesi aprel 1-den soñ işine devam etip olamaycaqlarını tahmin ete. Bu mesele mart 16-da Jenevada Birleşken Milletler Teşkilâtınıñ İnsan aqları komitetinde muzakere etilgen edi.
Telekanalnıñ işi toqtatıla bile dep, seyirciler ve faal cemaat Rusiye prezidenti Vladimir Putinge yarımadada milliy kütleviy haber vastalarını saqlap qalmaq açıq muracaatını yolladılar.
