Mart başında yarımadağa kelip, qırımtatarlarnıñ vaziyetine qıymet kesecek olğan türk ekspertlerniñ eyyeti alâ daa yarımadağa kelmedi.
Bunı Ukrinformğa Ukrainada Türkiye Cumhuriyetiniñ elçisi Yonet Tezel bildirdi.
«Andaki vaziyetke, hususan qırımtatarlarnıñ alına qıymet kesecek eyyetni yollamaq niyetindemiz. İşbu eyyet şimdi azırlana: şart, müddet, programmalar ögrenile», – dedi Tezel.
Cuma künü, mart 20-de, Türkiye prezidenti Recep Tayip Erdoğan Kiyevni ziyaret etmek kerek. O, Ukraina akimiyetiniñ vekilleri, em de qırımtatar halqınıñ liderlerinen körüşecek.
Bundan evel Türkiye tış işler naziri Mevlüt Çavuşoğlu Rusiye Türkiyege qırımtatarlar ile bağlı vadelerni yerine ketirmegenini ayttı.
Çavuşoğlunıñ aytqanına köre, Vladimir Putin Qırımğa resmiy Türkiye eyyetini kirsetmege razı oldı. İşbu eyyet qırımtatar halqınıñ vaziyetini ögrenecek. Türkiye eyyeti eñ yaqın vaqıtta Qırımğa yol alacaq, dep ayttı Çavuşoğlu.
