Qırımda qorqu müiti yaşara, – dedi cumaaqşamı künü, mart 19-da, Qurultay Teftiş saylav komissiya başı, qırımtatar areket faali Zair Smedlâyev Radio Svobodağa.
Yarımadada soñki yıl devamında olğan deñişüvlerni izaatlağan Smedlâyev dedi: «nasıldır bir müsbet deñişüvler aqqında aytacaq olsaq – yalan olur».
«Qırımda qorqu müitini yarattılar. İnsanlar ğayıp ola, olarnı bir kimse tapalmay. Suniy bir sebepten yaqalay bileler. Bir kimseniñ közüne ilişken, ya kâr ketire bilgen, ya da sadece Qırımtatar Milliy Meclisine ait olğan mülkni tutıp ala bileler. Bugün, söz sırası, Qırımtatar Milliy Meclis ofisiniñ binası boyunca Arbitraj mahkemesi keçirilecek edi. Yıl evelsi yüz bergen vaqialarğa qol tutmağan Meclis reisiniñ muavini şimdi apiste buluna», – qayd etti qırımtatar areket faali.
Zair Smedlâyev yarımadada söz ve toplaşuv serbestligi ile vaziyet beterleşüvini qayd etip, ukrain şairi Taras Şevçenko hatırasına aktsiya iştirakçileriniñ yaqalanuvını añdı.
«Söz serbestligi endi yoqtır. Anayasa qanunları, silâsız barışıq aktsiyalarnıñ keçirilmesi, şu cumluden, narazılıq aktsiyaları, bugün bu er şey yasaqtır», – dedi o
Evel, mart 19 künü, qırımtatar halq yetekçisi Mustafa Cemilev BMT Havfsızlıq şurasında «rusiyeli» Qırımda qorqu er şeyden üstün olğanını» bildirgen edi. O şunı da ayttı ki, Qırımnıñ işğalinden soñ yarımada sakinleri siyasiy, içtimaiy, iqtisadiy aqlarınıñ bozuluvına rastkelgen eken.
