Link açıqlığı

Cemilev BMT Havfsızlıq Şurasınıñ toplaşuvında: Rusiye rejiminiñ işğali sovet rejiminden beter


Qırımtatar halqınıñ yetekçisi Mustafa Cemilev

Rusiye rejiminiñ işğali sovet rejiminden beter, – dedi qırımtatar halqınıñ yetekçisi Mustafa Cemilev BMT Havfsızlıq Şurasınıñ toplaşuvında. Bunı öz twitterinde Ukrainanıñ BMT yanında daimiy temsilcisi Yuriy Sergeyev bildirdi.

«İnsanlar subet etmekten qorqa, «rusiyeli» Qırımda qorqu er şeyden üstün», – dep bildire Mustafa Cemilevniñ sözlerini twitterde Litvaniya temsilcisi.

Qırımtatar halq yetekçisiniñ sözlerine köre, Rusiye qırımtatarlar arasında «Kadırovnı» tapalmayıp, repressiya yolunı seçti.

O şunı da qoştı ki, Qırımnıñ işğalinden soñ yarımada sakinleri siyasiy, içtimaiy, iqtisadiy aqlarınıñ bozuluvına rastkeldi.

«Qırımnıñ qanunsız qoşuluvı yıllığından soñ biz vaziyetniñ beterleşüvini köremiz», – dedi Cemilev.

Evel BMT yanında Ukraina daimiy temsilcisi Yuriy Sergeyev aytqanı kibi, qırımtatar halqınıñ yetekçisi Mustafa Cemilevniñ çıqışı BMT Havfsızlıq Şurasında «büyük meraq» doğurdı.

Malüm ki, BMT Havfsızlıq şurası cumaaqşamı künü Rusiye tarafından işğal etilgen Qırım vaziyetini muzakere etti. Toplaşuvğa qırımtatar halqınıñ yetekçisi Mustafa Cemilev da davetli edi. Rusiye öz iştiraginden vazgeçti.

XS
SM
MD
LG