2015 senesi acılıqqa baracaq Qırım musulmanlarına 300 yer ayırdılar. Qırım musulmanları diniy idaresiniñ matbuat hızmetinde bildirilgeni kibi, yerlerni Rusiye acılıq-eyyeti terkibinden berdiler.
Mütenasip añlaşma mart 19 künü, cumaaqşamı, Saudiy Arabistan acılıq nazirliginde imzalanıldı.
Añlaşmanı Rusiye acılıq-eyyetiniñ reberi Magomed Gamzayev ve Saudiy Arabistan Qırallığınıñ acılıq işleri boyunca nazir muavini Heseyn bin Nasır Aşşarif imzaladılar.
Evel bildirilgeni kibi, Rusiye acılıq-eyyeti mart 15 kününden Saudiy Arabistanda buluna.
Malüm olğanı kibi, 2014 senesi 150 Qırım musulmanı Mekkege barğan edi.
2014 senesi Qırım musulmanları içün acılıq fiyatı 2,5 biñ dollarnı teşkil etti.
Acılıq – İslâmnıñ beş farzlarından biri. Er bir musulman ömürde bir kere bu farznı yerine ketirmeli.
