Link açıqlığı

Qırım ükümetiniñ yolbaşçısı Sergey Aksenov ATR yekâne qırımtatar telekanalınıñ işini tenqid etip, bunıñ kibi siyaseti olğan kütleviy haber vastaları yarımadada çalışamazlar, dep qayd etti.

Bunı o, mart 19-da Qırımnıñ Rusiye ile birleşüviniñ yıllığına bağışlanğan Moskvadaki tögerek masada jurnalistlerge ayttı, dep haber ete RİA Novosti.

«Kanal reberligine şimdiki yarı cenk vaziyetinde Qırım sakinlerine Qırımnıñ Ukrainağa qaytacağınıñ ümütini berip, vaziyetni qıyınlaştırğan, halqta kerginlik duyğularını peyda etken ve insanlarnı narazılıqlarğa çağırğan, em de soñra Rusiye pasportlarını alğan adamlarğa ne yapılacağını aytqan kanallarnıñ işi qabul etilmeycegini añlatqan ediler», – dedi Aksenov.

ATR telekanalınıñ reberligi 2015 senesi aprel 1-den soñ işine devam etip olamaycaqlarını tahmin ete. Bu mesele mart 16-da Jenevada Birleşken Milletler Teşkilâtınıñ İnsan aqları komitetinde muzakere etilgen edi.

Telekanalnıñ işi toqtatıla bile dep, seyirciler ve faal cemaat Rusiye prezidenti Vladimir Putinge yarımadada milliy kütleviy haber vastalarını saqlap qalmaq açıq muracaatını yolladılar.

XS
SM
MD
LG