Ukraina prezidentiniñ qırımtatar halqı işlerinden vekâletlisi Mustafa Cemilevniñ faaliyetni temin etüv bölügi «Kiyevo-Mogilânskaya akademiya» Milliy universiteti yanındaki «Krımskiye Studii» tasil-tedqiq merkezi esasında qırımtatar tilini ögrenüv usullarını azırlamaq ve kirsetmek içun bir sıra tedbirge başlay.
Bunı Cemilevniñ matbuat hızmeti bildire.
Birinci tedbir – «Qırımtatar tilini ögrenüvde yañı usullar» mevzusında tögerek masa 2015 senesi aprel 13-te keçirilecek.
«Muzakere neticelerine köre yañı usullar kirsetilmesiniñ esasları belgilenecektir. Böyle esaslardan biri latin urufatına keçüv, em de qırımtatar tilini ögüretüv esasınıñ tüzetüvidir», – dep bildireler qırımtatarlarnıñ işlerinden vekâletlisiniñ ofisinde.
İşbu esnasnıñ ekinci basamağı konferentsiya olmaq kerek. Tedbirde müellifler 2015-2016 seneleri qullanmağa teklif etilecek dersliklerini taqdim etecekler. Matbuat hızmeti qayd ete ki, ögretüv neticelerini semerelik ve neticelik ceetinden teşkerecekler. Konferentsiyanıñ sanı daa belli degil.
Milliy tasil mütehassısları ve qırımtatar tili derslikleriniñ müellifleri davet etile.
İşbu tedbirler Ukraina tasil ve ilim nazirligi ve İçtimaiy siyaset nazirliginiñ yardımı ile keçirilecektir.
