Aqmescitte mart 19-da Qırımnıñ arbitraj mahkemesinde yerli saatke köre saat 11:50 Medeniy mirasnı qoruv devlet komitetiniñ «Qırım» Fondu» Hayriye teşkilâtına açtırğan davası boyunca mahkeme toplaşuvı keçirilecektir. Şmidta, 2 adresi boyunca Meclis binası aqqında laf kete. Bunı Qırımtatar Milliy Meclisiniñ Merkeziy saylav komissiyasınıñ reisi Zair Smedlâyev bildire.
«Mahkeme Qırımdaki adaletniñ işareti olacaq, mahkemecilerniñ nege, qanunğa ya da siyasiy maqsatlarğa emiyet bergenini körecekmiz», – dep yazdı Smedlâyev Facebookta.
2014 senesi noyabr ayında Qırımnıñ medeniy mirasnı qoruv komiteti memuriy protokolnıtizgen edi. Oña binaen, «Qırım» Fondu» HT baş müdiri Riza Şevkiyev Rusiye Federatsiyasınıñ Memuriy bozuvlar kodeksiniñ 7.13 maddesiniñ 1-inci qısmı («Rusiye Federatsiyası halqlarınıñ memuriy mirası (tarih ve medeniyet yadikârlıqları) saqlap qaluv, qullanuv ve devlet qoruması talapları») belgilegen memuriy bozuvnı yaptı.
Aqmescitniñ Kiyev rayon mahkemesi Şevkiyevni 350 biñ rublege cezaladı. Aynı qarar «Qırım» Fondu» HT qarşı çıqarıldı, para cezasınıñ miqdarı 4,5 mln rubleni teşkil ete. Para cezası qarar işke tüşürilgen soñ altmış kün içinde ödenmek kerek.
