Qırım Ukrainanen edi, Ukrainanen şimdi ve er daim Ukrainanen olacaq, – dep ayttı çarşenbe künü, mart 18-de, Ukraina prezidenti Petro Poroşenko Twitter saifesinde.
Petro Poroşenko bunı Facebookta qırımtatarca, ukraince, inglizce ve almanca yazdı.
Malüm ki, çarşenbe künü, mart 18-de, Rusiyede Qırımnıñ Rusiyege qoşulması aqqında añlaşması imzalamasınıñ yıllığına bağışlanğan tedbirler olıp keçti.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
