Qırım Rusiye içün yalıñız topraq degil, maneviylik çoqrağıdır, – dep ayttı Rusiye prezidenti Vladimir Putin çarşenbe künü Moskvadaki «Berabermiz» miting-kontsertinde. Tedbir Qırımnıñ Rusiye terkibine qabul etilmesi aqqında añlaşma imzalamasınıñ yıllığına bağışlandı.
Qırım.Aqiqat mühbiri bildire ki, Putin toplaşqanlarnıñ «Rusiye! Rusiye!» şiarları altında sanağa çıqtı.
«Tam bir yıl evelsi bu künleri Rusiye, Rusiye halqı qırımlılar ve aqyarlılarnıñ tuvğan yerlerine qaytmaq yolunda birlik ve acayip vatanperverlikni kösterdi. Bizler beraber, baş ve yüregimiznen, nesiller ve zamanlar arasında bağını añladıq ve is ettik, memleketimiz içün qaraman ecdatlarımıznıñ ne qadar çoq yapqanını añladıq. Añladıq ki, Qırım meselesinde yalıñız strategik müim olğan topraq aqqında degil, yardım ve qoltutuvımızğa muhtac olğan millionlarnen rus adamı, millionlarnen semetdeşimiz aqqında laf kete. Añladıq ki, öyle de çoq olğan topraqlar degil, tarihiy bağ, maneviylik ve devletçilikniñ başı, bizni bir halq ve bir millet yapqan şey aqqında laf kete», – dep ayttı Putin.
Rusiye prezidenti bildirdi ki, «eskisi kibi rus ve ukrainlerni bir halq olaraq saya». Onıñ qayd etkenine köre, «milletçilik zararlı ve telükelidir». Rusiye prezidenti ukrainler «memleketni bu vaziyetke ketirgen adamlarğa» qıymet keseceklerine emin olğanını bildirdi.
«Bizler kendi tarafımızdan elimizden kelgenini yapacaqmız, Ukrainağa inkişafnıñ bu qıyın vaqıtnı keçmege ve devletler arasında bağlarnı ğayrıdan tiklemek içün er şey yapacaqmız», – dedi Putin.
O, rusiyelilerge teşekkürler bildirip, «Yaşasın Rusiye!» sözlerinen çıqışını yekünledi. Rusiye prezidentiniñ çıqışından soñ adamlar «Putin! Putin!» dep qıçırdılar. Soñra Rusiye gimni icra etildi. Sanada Rusiye lideriniñ yanında Qırım ve Aqyar şeeriniñ qanun çıqarıcı ve icra akimiyet reberleri turğan edi.
Malüm ki, Moskvada Qırımnıñ Rusiyege qoşulması aqqında añlaşma imzalamasınıñ yıllığına bağışlanğan «Berabermiz» miting-kontserti başlandı.
