Link açıqlığı

Jirinovskiy: qırımlılarnı 23 yıl devamında işğalde qıynadılar, şimdi Qırım serbest memlekette


Rusiye Liberal-demokratik firqasınıñ (LDPR) lideri Vladimir Jirinovskiy

Ukraina mustaqilliginiñ 23 yılı devamında Qırım işğalde yaşadı, şimdi ise, Rusiyege «qoşulıp», «serbest memlekette yaşay», – dep ayttı Rusiye Liberal-demokratik firqasınıñ (LDPR) lideri Vladimir Jirinovskiy çarşenbe künü, mart 18-de, Moskvadaki «Berabermiz» kontsertinde. Tedbir Rusiye prezidenti Vladimir Putinniñ Qırımnıñ Rusiye Federatsiyası terkibine qabul etilmesi aqqında añlaşma imzalanmasınıñ yıllığına bağışlandı.

Tedbirni canlı yayında «Rossiya 24» telekanalı köstere, – dep haber ete Qırım.Aqiqat.

«Bizler serbest memlekette yaşadıq ve yaşaymız, olar ise (qırımlılar – muar.) 23 yıl devamında işğalde yaşadılar, olarnı qıynadılar, rusça laf etmege, rus filmlerni seyir etmege, rus muzıkasını diñlemege keder ete ediler, yabancı tilni, diger medeniyetni ögrenmege zorlağan ediler. İşğal bitti, bir yıldan berli Qırım – memleketimizniñ bir parçasıdır», – dep ayttı Rusiye siyasetçisi.

Jirinovskiy Qırım işğalini «bu asırnıñ eñ müim vaqiası» dep adladı.

«Er bir asırnıñ belli vaqiaları bar: XIX asırda Napoleonnı yoq ettiler, XX – Gitlerni, XXI asır ise Qırımnıñ Rusiye ile, Aqyarnıñ Rusiye ile birleşüv yılı olacaqtır. Qurbansız, qansız ğalebe», – dep ayttı o.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG