Türkiye prezidenti Recep Tayip Erdoğan Kiyevge mart 20 künü olacaq ziyareti çerçivesinde qırımtatar halq yetekçileri ile ayrı körüşüvni keçirecek.
Bunı Qırım.Aqiqatqa Ukraina prezidentiniñ qırımtatar halqınıñ işlerinden vekâletlisi Mustafa Cemilev faaliyetiniñ temin etüv bölükniñ reberi Arsen Jumadilov bildirdi.
Şu cümleden, Türkiye prezidentiniñ Cemilev ve Meclis reisi Refat Çubarov ile körüşüvi planlaştırılğan.
«Bunıñ ile körüşüvde Qırımda artqan basqı neticesinde Kiyevge kelgen Meclis azaları iştirak etecek. Tedbirde iştirak etecek şahıslarnı liderlerimiz körüşüvden evel belgiler», – dedi Jumadilov.
Onıñ malümatına köre, Türkiye yetekçisi ile Qırımda insan aqlarınıñ bozuluvı ve Türkiyeniñ Qırımda Rusiye areketlerine seslenüvi muzakere etilecek.
Jumadilov şunı da bildirdi ki, Cemilev Ukraina yolbaşçılığınıñ Erdoğan ile körüşüvinde de iştirak etecektir.
2014 senesi dekabr 1-de Erdoğannıñ Rusiye prezidenti Vladimir Putin ile körüşüvi olıp keçti, neticede Türkiye yetekçisi böyle dedi: «Rusiyeniñ qırımtatarlarğa yanaşuvını musbet tanıymız. Olar (Rusiye akimiyetiniñ vekilleri – muar.) qırımtatarlarğa evel olmağan aqlarnı berecek olalar».
2015 senesi fevral ayında Rusiyeniñ Türkiyedeki elçisi Andrey Karpov Türkiyeden resmiy olmağan eyyetniñ Qırımğa kelecegini bildirgen edi.
