Aqmescitte saba Qırım işğaliniñ yıllığını qayd etmege başladılar. Yarımadanıñ Rusiye akimiyeti buña «Rusiye ile birleşüv» dey.
Qırım.Aqiqat mühbiri bildirgeni kibi, saba şeer merkezinde areket bütünley qapaldı.
«Qırım baariniñ» qayd etüv tedbirlerinden biri ava tehnikasınıñ paradı oldı, tedbirge Qırım Devlet şurasınıñ başı Vladimir Konstantinov da keldi.
Qırım.Aqiqat mühbiriniñ sözlerine köre, etrafnı uquq qoruyıcılar sarıp aldı, çette «acele» yardım maşinaları ve yanğıncılar tura.
«Qırım – Rusiye olğanından iç te şübe etmey edik. Biz daima bunı bile edik, Rusiye de bile edi, ve, işte, mındamız, Vatanımızda. Qarşılığımız sayesinde natsistlerge Qırımğa yapışmağa imkân bermedik. Qırımımıznı qorçaladıq», – dedi Konstantinov.
2014 senesi mart 18 künü Moskvada «Qırım ve Aqyarnıñ Rusiyege qoşuluvı aqqında» añlaşma qabul etildi. Qırmda mart 18 – raatlıq künü olaraq qayd etile. Yarımadada mart 18-de aqşamğa qadar sürecek tedbirler azırlanılğan.
Dünyada Qırım işğali yıllığında Ukrainanıñ işbu toprağınıñ işğali tanılmağanını bildireler.
AQŞda işğal etilgen Qırımda insan aqları ile bağlı vaziyetniñ zor olmasına ayrı diqqat ettiler.
Avropa birligi ve AQŞ Rusiyege ve Qırım separatistlerine qarşı kirsetilgen cezalar Qırım işğalden azat etilmeycegine qadar saqlanılacağını bildireler.
