LDPR deputatı Sergey Furgal mart 18 künü «Qırım ve Aqyarnıñ Rusiye terkibine qoşuluv kününi» teşkil etmek teklifi ile buyurdı. O, «Arbiy şüret ve hatıra künleri aqqında» Federal qanunınıñ 1.1. maddesine mezkür deñişüvni yaqın künleri azırlaycaq ola, haber ete İzvestiya.
«Qırımnıñ Rusiye ile birleşüv kününi memleketimizniñ ğayrıdan doğuvı kibi tanımaq mümkün. Çünki ğayrıdan quruv yılları Rusiye bayağı coyğan edi. Bugün ise er kes rus dünyası aqqında ayta, memleketimiz ulu devlet statusını qaytara. Eminim, bu kün vatanımıznıñ tarihında müim künlerniñ sırasına kirmeli», – dey qanun leyhasınıñ müellifi.
Yaqında Rusiyede Qırım işğali ile bağlı olğan daa bir bayram belgilendi – fevral 27 künü «Mahsus ameliyat küçleriniñ künü» qayd etilgen edi. Onı prezident Vladimir Putinniñ avalesi ile meydanğa ketirdiler.
2014 senesi mart 18-de Moskvada «Qırım ve Aqyarnıñ Rusiyege qoşuluvı aqqında» añlaşma imzalanılğan edi. Bu künni Qırımda raatlıq künü olaraq ettiler.
İşğal yıllığı munasebeti ile dünyada Ukrainanıñ bu torpağınıñ Rusiye tarafından işğal etilmesi tanılmağanını bildireler.
AQŞ işğal etilgen Qırımda insan aqları ile bağlı vaziyetniñ zor olmasına ayrı diqqat ettiler.
