Rusiyeniñ Qırım işğaliniñ yıllığında prezident Vladimir Putinni yarımadada qırımtatar matbuat vastalarınıñ qapatılmasına fırsat bermemek ve Rusiye qaidelerine köre qayd etüvinde yardım etmege çağıralar.
Seyirci ve faal cemiyetniñ mütenasip muracaatını öz Facebook saifesinde Qırım Muhtar Cumhuriyeti ve Ukrainada nam qazanğan artist Elzara Batalova aşkâr etti.
«Biz, aşağı imza qoyğan, birinci ve yekâne qırımtatar: «ATR» telekanalı, «Lâle» bala telekanalınıñ seyircileri ve «Meydan-FM» radiostantsiyasınıñ diñleyicileri, mezkür matbuat resurslarınıñ qayd etüvinde yardımcı olğanıñıznı isteymiz. Aprel 1 künü Qırım matbuat vastalarınıñ Rusiye qanuniyetine köre qayd etüv müddeti soñuna yete, ATR telekanalı Roskomnadzorğa defalarca vesiqalarını berse de, olarnı alâ daa tasdiqlamadılar», – denile muracaatta.
Mektüp müellifleri şunı qayd eteler ki, Roskomnadzorğa bütün zaruriy vesiqalarnı bergen «Lâle» bala telekanalı ve «Meydan» radiosı da yañıdan qayd etilip olamay.
«Dünyada birinci ve yekâne qırımtatar telekanalı ve radiosınıñ qapatıluv telükesi ola, böyleliknen qırımtatarlar til, medeniyet, milliy adetlerni saqlap, inkişaf etmek imkâniyetinden marum qala», – deyler muracaatta.
«Meydanğa kelgen işbu matbuat resursları yalñız qırımtatarlar arasında degil de, kumık, qaray, balqar, tatar ve diger türk tilli ve çoq milletli Qırım ve Rusiye Federatsiyasında diger halqlar arasında ğayet belli oldı», – denile muracaatta.
Mında şunı da qayd eteler ki, «ATR, Lâle ve Meydan radiosınıñ qapatılması Rusiye prezidentiniñ qırımtatar halqınıñ aqlavı aqqında emrine ters kele ve Qırım Cumhuriyetinde milletlerara munasebetlerine menfiy tesir ete bile».
Muracaat Rusiye baş naziri Dmitriy Medvedev, ombudsmen Ella Pamfilova, Qırım baş naziri Sergey Aksönov, Rusiye Federatsiyasınıñ Qırımda vekâletli temsilcisi Oleg Belaventsev adına yollanılğan.
ATR telekanalınıñ yolbaşçılığı Qırımda 2015 senesi aprel 1-den yayınlavnıñ toqtatıla bilecegi aqqında bildirgen edi. Bu mesele mart 16 künü Jenevada İnsan aqları boyunca BMT komitetinde de muzakere etilgen edi.
