İnsan aqları boyunca BMT komitetiniñ 113-nci toplaşuvında mart 16-17 künleri Rusiye eyyetine «Qırım aqqında bir qaç nahoş sual» qoyuldı, – dedi Qırım.Aqiqatqa «Almenda» vatandaşlıq maarif merkeziniñ reisi Оlga Skripnik.
Onıñ sözlerine köre, Rusiye eyyeti ögünde Qırım yarımadası aqqında bir qaç sual qoyuldı, şu cümleden Rusiyege Qırım matbuat vastaları, ATR ve «Çernomorskaya» telekanalları aqqında sualler yanğıradı.
Bunıñ ile İnsan aqları boyunca BMT komitetiniñ toplaşuvında Qırım «halq imayesi» aqta sual berilgen edi. Rusiye eyyetine «halq imayesiniñ Qırımğa insanlarnıñ ğayıp oluvına, jurnalistlerniñ taqibine, tevqifine olğan alâqasını» añlatmağa rica ettiler.
«Qırım sakinleriniñ vatandaşlıq statusınıñ meselesi muzakere etilgen edi, yani: ne içün Rusiye vatandaşlığından vazgeçüv müddeti öyle qısqa edi, ne içün Rusiye vatandaşlıq statusı öksüz balalarını nazarda tutmay, Rusiye vatandaşlıqtan vazgeçüviniñ tasil ve tibbiyetke olğan tesiri kibi sualler bar edi», – dey Olga Skripnik.
Bunıñ ile Qırımğa Mustafa Cemilev ve Refat Çubarovğa kiriş yasaqlığı aqqında, yarımadağa diniy cemiyet vekilleriniñ kiriş meseleleri, ukrain tili ocalar sayısınıñ qısqartıluvı kibi meseleler köterildi.
Evel bildirilgeni kibi, bu künleri toplaşuvda Rusiye Federatsiyasınıñ Ruside insan aqlarınıñ vaziyeti aqqında maruzası oqula. Rusiye Qırımnı öz toprağı olaraq sayğanı içün Komitet toplaşuvda Qırımda insan aqlarınıñ vaziyeti ile bağlı malümatnı da aşkâr etti.
