Link açıqlığı

Aqyar mahkemesi Hizb ut-Tahrirge alâqası olğanında şeklengen qırımlılarnıñ apis müddetini uzattı


Hizb ut-tahrir teşkilâtınıñ faaliyetine alâqası bar olğanıda şekengen üç qırımlığa apis müddetini uzattılar. Böyle qararnı mart 16 künü Aqyar şeer mahkemesi qabul etti, bildire İnsan aqları boyunca Qırım alan eyiyeti.

Adliyeci Emil Kürbedinovnıñ atqanı kibi, mahkemeniñ böyle qararınıñ añlamı: «şeklengenlerniñ taqiqattan saqlanılması mümkün, şunıñ içün olarnıñ apiste bulunması taqiqat işlerniñ keçirilmesi içün kerek» eken.

Yanvar 23 künü Aqyar civarında Rusiye Federal havfsızlıq hızmetiniñ hadimleri üç insannı yaqaladı, tintüvni keçirdiler. Aynı şu künü mahkeme keçti ve yaqalanğanlarğa eki ay apis cezasını belgilerdiler.

Yaqalanğanlarnı Rusiye Federatsiyası Cinaiy kodeksiniñ 205.5 maddesini («Terroristik teşkilât faaliyetini teşkil etüv ve bunıñ kibi teşkilâtlarnıñ faaliyetinde iştirak etüv») bozğanlarında şekleyler. İşbu madde boyunca 15-20 yıllıq apis cezası ya da ömür boyu apis cezası belgilene.

Kürbedinovnıñ sözlerine köre, işbu insanlar Ukraina Havfsızlıq Hızmeti tarafından nezaret etilse de, olarnıñ Hizb ut-Tahrir teşkilâtına aitligi öyle de tasdiqalanılmadı.

XS
SM
MD
LG