Link açıqlığı

İşğal yıllığında qırımlılarnı «Sovetler birligi» ve «Zabitler» aqqında yırlarnen eglendirdiler


Mart 16-da Aqmescitniñ merkeziy meydanında «Qırım baari» olaraq belli vaqialarnıñ, şu cümleden sahte referendumnıñ, yıllığına bağışlanğan bayram kontserti olıp keçti.

Qırım.Aqiqat mühbiri bildire ki, kontsert programmasında «Arhipelag», «Eskadron» taqımları, «Dobrı molodtsı» ansambli, Kubanskiy kazaçiy hor, em de Rusiye sanatçısı Oleg Gazmanov iştirak ettiler. O, «Men Sovetler Birliginde doğdım», «Zabitler» ve diger yırlarnı icar etti.

Adet üzre kontsert yerini ve oña yaqın soqaqlarnı uquq qoruyıcılar sarıp aldı. İcracılarnıñ çıqışları yerli saatke köre saat 22:00 bayram feyyerverki ile yekünlendi.

Mart 16-da Aqmescitte Qırım işğaliniñ yıllığına bağışlanğan bir sıra tedbir olıp keçti. Mart 18 künü yarımadada tatil olacaq.

Aynı zamanda bütün dünya işğal etilgen topraqlarnı tanımağanını daa bir kere hatırlattı. Avropa birliginiñ çetel işler yüksek temsilcisi Federica Mogherini yarımadada toqtamayıp arttırılğan Rusiye orduları sebebinden qasevetlengenini bildirdi. AQŞ Devlet departamenti işğal etilgen Qırımda insan aqları vaziyetiniñ kerginleşmesini qayd ettiler.

Em Avropa birligi, em de Amerika Qoşma Ştatları qayd eteler ki, Rusiye ve Rusiyege qoltutqan Qırım separatistlerine qarşı kirsetilgen cezalar Rusiyeniñ Qırım işğali bitkenine qadar lâğu etilmeycek.

XS
SM
MD
LG